ልጅ
እያለው… ገላዬን የምታጥበኝ እናቴ ነበረች… በሳምንት ቁጥሩን በውል የማላውቀው ጊዜ ታጥበኛለች… ኋላ ግን ጉርምስናው ሲመጣ- ማባበጥና
ማበቃቀል ስጀምር… እፍረትም አብሮ መጣና እራሴ እታጠባለው ማለት ጀመርኩ…
እናም…
ልክ እንደ አብዛኛው ኢትዮጲያዊ ገላዬን በሳምንት አንዴ መታጠብ ጀመርኩ… ሰንበትን ጠብቄ፡፡ ያኔ ተማሪ እያለን እሁድ ብዙ ነገር
ናት፡-
-
ገላችንን እንታጠባለን…
-
ካልሲዎቻችንን እናጥባን…
-
ጫማችን ሸራ ወይንም ስኒከር ከሆነ በቆሮቆንዳ ፈትግን
እናጥባለን…
-
ቆዳ ከሆነ ደግሞ በስፖንጅ ወልውለን፣ በቁራጭ ጨርቅ
አድርቀን፣ በባለ እንጨቱ ቡርሽ ኪዊ ቀለም እስኪያብረቀርቅ ቀብተን አልጋ ስር እናስቀምጣለን…
-
ዩኒፎርማችንን አጣጥፈን ወንበር ላይ እናስቀምጣለን…
ይሄን ሁሉ ነገር ከስምንት ሰዓት
በፊት እንጨርስና ስምንት ሰዓት ላይ 120 ለማየት እንደረደራለን… 120 ብዙ ደስ ደስ የሚሉ ነገሮች ነበሩት… ከአድማስ ባሻገር፣
አጀብነው… ሌላም፣ ሌላም… ዜናው ሁላ ደስ ይል ነበር…
-
120 ሲያልቅ ደግሞ ጂሌት ወርልድ
ስፖርት ስፔሻል እናያለን…በቃ… የድሮዋ እሁድ ብዙ ነገር ነበረች… እናም እወዳት ነበር… ልክ አሁን አሁን ቅዳሜን እንደምወዳት፡፡
አይገርምም? እድሜ ሲጨምር የሳምንቱ ምርጥ ቀናችን ይቀንሳል ማለት ነው?
እሁድን ሙሉ ለሙሉ አልወዳትም ነበር… እሁድ ማታ ትደብር ነበር… አባቴ ከያለንበት ያስጠራንና…
"የቤት ስራ ሰርታችኋል? እርሳስ፣ እስኪሪብቶ… አሳዩ" እንባላለን… ብዙ ጊዜ እስኪሪፕቶ ስለሚጠፋብኝ ወይ ከጎረቤት
ልጆች ተቀብዬ አሳያለው አልያም… ሁሌም የማሳያትን ያለቀች ቢክ እስኪሪፕቶ ከደበኩባት አውጥቼ አሳይና አዲስ እቀበላለው፡፡
ከዛ ያ ቀፋፊ ሰኞ ይመጣል… ከሰኞ እስከ አርብ ያለው ቀን አንድ አይነት ነው… ጠዋት ተነስቶ
ሻይ በዳቦ በልቶ ወደ ትምህርት ቤት መሄድ… ከትምህርት ቤት ተመልሶ እግርን በማስታጠቢያ ውስጥ ዘፍዝፎ መታጠብ… መክሰስ በልቶ
የቤት ስራ መስራት… ከዛ ማጥናት… ከዛ ፔትሮላተም ቅባት ተቀብቶ መተኛት….
ያኔ… ተማሪ እያለን… ቀኑን ሙሉ ስንራገጥ ስለምንውል… ላብ በላብ ሆነን አቧራችንን ጠጥተን
ወደ ቤት እንገባለን… አንድ አይነት ልብስ-ዩኒፎረም ሳምንቱን ሙሉ ስለምንለብስ እከኩ መከራ ነው፡፡
ደግሞ ምን እንደሚያናድ ታውቃላችሁ? እከክ የሚይዘኝ አልባሌ ቦታ ላይ መሆኑ… መሃል ጀርባዬ
ላይ… የማልደርስበት ቦታ…
መጀመሪያ የቀኝ እጄን በማጅራቴ በኩል ወደ ኋላዬ እልክና ለማከክ እሞክራለው… እፍፍፍ… እንዴት
አባቱ እንደሚበላ… ዝለል ዝለል ይለኛል… አልደርስበትም… እንደገና የግራ እጄን እልክና ወደ ኋላዬ በእጄ እሳባለው… ጀርባዬ ላይ…
እከኳ ላይ ለመድረስ… አአአአአ… አሁንም አልደርስበትም… ከዛ ደግሞ በወገቤ በኩል አድርጌ እጄን ወደ ላይ አንፈራጥጥና እሞክራለው…
ጀርባዬን በጥፍሬ እቧጭራለው… ኡኡኡኡ… አሁንም አልደርስበትም… በቃ ያቁነጠንጠኛል… ያዘልለኛል… እንደ በግ ግድግዳ ላይ እታከካለው…
ግድግዳ መታከክ በራስ እጅ እንደ ማከክ አያስደስትም… እንደገና እጄን እያፈራረቅኩ እሞክራለው…
የእከኬን አስኳላን… አፏን ለማግኘት… ይሄን ጊዜ አንዱ ጓደኛዬን አይና… "ኡሁሁሁ… በናትህ ጀርባየን እከክልኝ… እዚህ
ጋ…" ብዬ የማልደርስበትን ቦታ በእጄ እጠቁማለው…
ከፍ… ትንሽ ከፍ… በቃ… ትንሽ ወደ ግራ… ኖ… ትንሽ… ትንሽ ወደ ቀኝ… ወደ ታች… በቃ…
በቃ! እሱ ጋ… ኡሁሁሁ… በደንብ… በደንብ… እ-ሰ-ይ! ሳላቀው ጣፍጭ ምራቄ አገጬ ላይ ይዝረበረባል… አይኔ ይስለመለማል… እፍፍፍ…
የሆነ በቃላት የማይገለፅ ደስታ ይሰማኛል… እንደሱ አይነት እርካታ የምረካው አንድም ሽንቴን ወጥሮኝ ስሸና… አሁን አሁን ደግሞ
እንትን ሳደርግ ነው፡፡
አንድ ጓደኛዬ ይሄን ፅሁፍ ስፅፍ አጠገቤ ነበር… ስለ እከክ አንድ ቀልድ ነገረኝ… እነሆ፡
አንዱ እንደኔው ያሳክከውና ጓደኛውን ጠርቶ "…ጀርባዬን እከክልኝ?" ይለዋል…
አካኪው ታዲያ ከፍ፣ ዝቅ፣ ወደ ግራ… ሳያስብል የበላው ቦታ ላይ- የእከኩን አፍ በአንዴ አግኝቶ ያክለታል…
ታዲያ… ልጁ የበላው ቦታ ላይ በአንዴ ሲያክለት በጣም ተገርሞ… ምን እንዳለው ታውቃለህ?
.
.
.
"እንዴ! አተንተ ነህ እንዴ የበላኸኝ?"
No comments:
Post a Comment