ፍቅርኛ

ፍቅር… ፍንቅር ቅር… ምንቅር ቅር… ፍር ፍር ፍር… ፍርቅቅቅ… ፍቅቅቅ…  ፍ-ቅ-ር-ዬ… የኔ ቆንጆ… (ፍቅርን የኔ ቆንጆ ያለ ብቸኛ ተብሎ ይያዝልኝ)… አቦ እንዴት አባቱ ደስ የሚል ነገር ነው-ፍቅር…

ኡፍፍፍ… በተለይ የኔና የሷ ፍቅር… የኔና የሷ ፍቅር እስከዛሬ ከተፃፈውም፣ ከተዘፈነውም፣ ከተተወነውም፣ ከተገጠመውም፣ ከተተረከውም በላይ ነው፡፡ ጉረኛ እንዳትሉኝ… እንዳትታበዩም… በቃ… ዝም ብላችሁ አንብቡ…

የኔና እሷ ፍቅር ከላይ እንዳልኳችሁም… እንዳላልኳችሁም ነው… ለዛም ነው… ስለኔና እሷ ፍቅር የማልፅፈው… ለዛም ነው ስለኔና እሷ ፍቅር የማልገጥመው… ሼክስፒር እንኳን በኛ ጊዜ ቢኖር የኔና እሷን ፍቅር እንዲፅፈው አልፈቅድለትም፡፡ ምክንያቱም የኔና እሷ ፍቅር ከቃላት በላይ ነው… የኔና እሷን ፍቅር ቃላቶች ያሳንሱታል እንጂ አይገልፁትም… እስኪ አሁን… ውብ… ገዳይ… ፈንዲሻ... አፍዝ… እንኮይ… ጥዝዝ… ጭርር… ብዝዝ… ምና ምን… ምና ምን… እያልኩ በየቀኑ አዳዲስ ስም የማወጣለትን ፈገግታዋን ሼክስፒር ምን ብሎ ይፅፈዋል?

ዛሬ የምታሳየኝ የፈገግታዋ ውበት ከትላንቱ የተለየ ነው… የጠዋቱ ከማታው… የማታው ከከሰዓቱ… ሁሉም የየራሱ ውበትና ትርጉም አለው… ታዲያ ሼክስፒር ይህን ፈገግታዋን ብቻ በአንድ መፅሀፍ ፅፎ ይጨርሰዋል? አይመስለኝም፡፡

በቃ… የኔና እሷ ፍቅር… ውይይይይ… ምን ልበላችሁ? ምንም ብላችሁ አልገልፀውም… ብገልፀውም አይገባችሁም… የኔና እሷን ፍቅር ሊገልፁት የሚችሉ ቢኖሩ እኔና እሷ ብቻ ነን፡፡ እኔና እሷም በፅሁፍና በወሬ ሳይሆን በመፋቀር ብቻ ነው የምንገልፀው… ፍቅርቅርቅር… እየተደራረግን… ውድድድድ… እየተደራረግን…  

የኔና እሷን ፍቅር ተቀርፆ ብታዩት እንኳን… ቋንቋው አይገባችሁም፡፡ ምክንያቱም… አንደኛ- ከምስልም ከድምፅም በላይ የሆኑ በአቅመ-ካሜራ የማይቀረፁ ነገሮች ስላሉት… ሁለተኛ- ቋንቋው እራሱ ፍቅርኛ ስለሆነ…

ፍቅርኛ ልዩ ቋንቋ ነው… በፍቅር ውስጥ ያሉ ጥንዶች ብቻ የሚፈጥሩት…  በፍቅር ውስጥ ያሉ ጥንዶች ብቻ የሚያወሩት… በፍቅር ውስጥ ያሉ ጥንዶች ብቻ የሚግባቡት ቋንቋ… ፍቅርኛ ጥንዶችን ብቻ የሚያግባባ ቋንቋ ነው ከሁለቱ ተፋቃሪዎች ውጪ ለሌላ ለማንም አይገባም… የአንዱ ጥንድ የፍቅር ቋንቋ ከሌላው የተለየ ነው… የኔና የእሷ ግን ከጥንዶች ሁሉ በፍፁም የተለየ ነው… እኔና እሷ በፍቅር ቋንቋ የረቀቅን ነን… ፍቅርኛን ወደ ላቀ ደረጃ ከፍ ያደረግን… ለዚህም ነው የኔና እሷን ፍቅር ላወራውም፣ ልፅፈውም የማልችለው… ምክንያቱም… አይገባችሁም!  

"ግድየለህም!" ካላችሁኝ ግን ፅፌ ላሳያችሁ… ለምሳሌ ቀጣዩ ፅሁፍ እሷ እኔን "እወድሃለው" ስትለኝ ነው… "¤¥±ÐኊªፘÏዄ፨ጜ¤ፚፙዿ"    

እህስ?

አላልኳችሁም?

ዝም ብላችሁ ነው…

አይገባችሁም!