ጉዞ አልባው የጉዞ ማስታወሻ

ይቺ የጉዞ ማስታወሻ ከሌሎች የጉዞ ማስታወሻዎች በእጅጉ ትለያለች፤ "እንዴት?" አትሉም…

ሲጢጢጥ…. በናታችሁ… ቆይ… አንዴ… ታይም አውት… ወደ ዋናው ፅሁፌ ከመግባቴ በፊት አንድ ነገር ልበላችሁ…

መቼም የመጀመሪያዋን አረፍተነገር ስታነቡ… "በምን ይሆን ይቺ የጉዞ ማስታወሻ የተለየችው?" ብላችሁ መጠየቃችሁ አይቀርም፤ ወይም ደግሞ… "እቺማ እንደ ዘንድሮ ማስታወቂያ አገባብ ማሳመሪያ ናት፣ ለሽያጭ ናት…" ብላችሁ ይሆናል፡፡ አትፍረዱብኝ… ዘንድሮ እኮ ሁሉ ነገር ውድድር ሆኗል፤ ሁሉ ነገር ሽያጭ ሆኗል…

ኢንፎርሜሽን እንኳን ሳትፈልግ በግድህ የምትጋትበት ሁኔታ ነው ያለው፡፡ የቱን አንብበህ፣ የቱን መተው እንዳለብህ ለመምረጥ እንኳን ፋታ አታገኝም፤ ዞር ስትል ጋዜጣ ነው፣ ዞር ስትል መፅሄት ነው፣ ዞር ስትል እንትናዬ እቺን ፍላየር ነው፣ ግድግዳው፣ ታክሲው፣ ባሱ፣ ልብሱ… ሁሉ ነገር ማስታወቂያ ነው፣ መረጃ ነው፡፡

ታዲያ አንዳንዴ… ሁሉ ነገር ይሰለችህና የፅሁፍ ጋጋታ የሌለው ዕይታ ናፍቆህ ወደ ሰማይ ስታንጋጥጥ ሰማይ ላይ ተሰቅለው ሰማይ አላሳይ የሚሉ፣ ሰማይ ጠቀስ ቢልቦርዶች ያጋጥሙሃል… በቃ እንደለመደክው ሳትወድ በግድህ ወደ ሐበሻዊነትህ ትመለሳለህ… አንገትህን ትደፋለህ… ያለ ቅንነትህ ቅን ትመስላለህ፤ የወደቀ ዕቃ የምትፈልግ ይመስል በግድ አንገትህን ቀብረህ ትርመሰመሳለህ…

እናም ይህ ሁኔታ ባለበት፣ እንደ ፀሃፊ፣ ለምትፅፈው ፅሁፍ አንባቢ አገኝ ይሆን ብለህ መጠየቅህና መስጋትህ አይቀርም፡፡ ለዚህ ነው ምንግዜም ፅሁፌን ስጀምር፣ የመጀመሪያዋን አረፍተነገሬን ረጅም ሰዓት ወስጄ የማስበው፡፡ አስቤ፣ ሰርዤ፣ ደልዤ በቃ በምርጥ አረፍተነገር እገባለሁ… የዛሬው ግን እንደዛ አይደለም፣ በቃ ፅሁፉ እራሱ ለየት ያለ ነው… ብትፈልግ አንብብ ባትፈልግ ተወው! አልልህም… አንብበው… ገዳይ ወግ ነው፡፡

ስለዚህ ደግሜ እላችኋለው… "ይህች የጉዞ ማስታወሻ ከሌሎች የጉዞ ማስታዎሻዎች በእጅጉ ትለያለች" አሁን በቀጥታ ወደ ነገሬ ልገባ ስለሆነ… "እንዴት?" በሉ… ነገሩ እንዲህ ነው…

የጉዞ ማስታወሻ ሲባል አንድ ሰው ወደ አንድ ቦታ በሄደበት ወቀት ያጋጠመውን፣ ያስተዋለውን፣ የሰማውን፣ ያነበበውን… ሌላም ሌላም ነገሮችን አክሎ፣ ውብ ስነፅሁፋዊ ጥበብን አላብሶ የሚያቀርበው ፅሁፍ ነው፡፡ ይህች የጉዞ ማስታወሻዬ ግን እኔና ጓደኞቼ አንድ ቤት ውስጥ ቁጭ ብለን፣ በምርቃና ባቡር ተሳፍረን፣ በሃሳብ ሰረገላ ተጉዘን፣ ያየናቸውን፣ የተገነዘብናቸውንና፣ የተዝናናንባቸውን፣ ግብብዳ የሳቅ እንባ ዘለላዎችን የተረጫጨንባቸውን ጉዳዮች ለናንተ የማጋራባት፣ ጉዞ አልባ የጉዞ ማስታወሻ ናት፤ ንሱማ… ዝለቁ…

ወደ ጉዟችን ከመዝለቃችን በፊት… አብረውኝ የሚጓዙትን ተሳፋሪዎች በጥቂቱ ላስተዋውቃችሁ…

ሼባው- ሼባው ‘‘እድሜው ትልቅ ነው…'' እያልን የምናማው ጓደኛችን ነው… የምር ግን… በቅንፍ ውስጥ… ድምፄን ዝቅ አድርጌ… ይቀቅመናል!

ሌላው ሰላ ነው፤ ሰላ በቃ መመርቀን የሚወድ፣ የግሩፓችን ዋና የቀልድ አከፋፋይና ብቸኛ አስመጪ ነው፡፡

ጎሹ ደግሞ እንደ ጎሽ ትከሻው ሰፊ እና በጭንቅላቱ ሳይሆን በቀንዱ የሚያስብ ብለን የምናሞካሸው ጓደኛችን ነው፡፡

አለችላችሁ ደግሞ ኤም.ፒ.ስሪ (mp3)፡- mp3 ሴት ጓደኛችን ስትሆን በቃ ነን እስቶፕ ቀዳጅ ናት፣ የወሬ ቋት…

ሌላዋ የግሩፑ አዝናኝ ደግሞ ግራ ናት፤ ግራ ወሬዋ ሁላ ግራ የገባውና የራሶችዋን ቃላቶች በመፍጠር የምትታወቅ ናት፤ በሷ አመርኛ መልሼ አማርኛዋን ስገልፀው… ‘አማርኛዋ የተንቦራደሰ ነው…'

ቀንዶ- ቀንዶ በተረበኛነቱና በአረቄ አፍቃሪነቱ የሚታወቅ ጓደኛችን ነው…

ፌዶ- ሃርደኛ ጀለሳችን ናት፣ ከመሬት ተነስታ ፊትዋን የምትፈጠፍጥ ወይም በኛ አገላለፅ ዝም ብላ ጓ! የምትል…

ሱፔ ደግሞ የራሱ ቋንቋ ያለው ወጣ ያለ ጓደኛችን ነው…

በሉ በሉ… እኔ ሃተታዬን ሳበዛ ጉዞው ሊጀምር ነው፤ እኔን ጨምሮ አስር ተጓዦች ባቡሩ ላይ ተሳፍረናል… እንደለመድኩት በመስኮት በኩል ተቀምጫለሁ… አብራችሁኝ ተጓዙ….

ሰላ፡ አያምርም? እስቲ እየው በናትህ! እንዴት አባቱ ለምለም ነው ባክህ… ደግሞ ዝንፍልፍል ማለቱስ የሚናቅ ነው? ካካካካ….

ጎሽ፡ ፐ! ምርጥ ነው… አንተ እስከ ዛሬ የት ሆነን ነው… እዚሁ አጠገባችን ሆኖ ሳናየው… ተሸውደናል! ሁለተኛ ከሉሉ በለጬ አንገዛም? እየው እስቲ፣ እጁ እራሱ… አንደኛ ነው… በዛ ላይ ቅላቱ…

ሱፔ፡ ኢግሩስ እራሱ…

ሁላችንም ካካካካካ… ሱፔ ከወሬው ይልቅ የአነጋገር ዘይቤው (አክሰንቱ) ሽንታችንን ነው የሚያስጨርሰን፡፡ አማርኞቹን እያንሻፈፈ ነው የሚያወራቸው፡፡

ቀንዶ፡ አቦ ሰዓት የለም… አምጣው ባክህ እንቃምበት… ዝም ብለህ አታሽሞንሙነው…
ኤም.ፒ.ስሪ (mp3)፡ ቀንጥሱልኝ?
ግራ፡ እኔ ልበጥስልሽ?
ባቡሩ በሳቅ ድብልቅልቁ ወጣ... ሰላ አልቻለም፣ መሬት ላይ እየተንከባለለ እየሳቀ ነው…

ሼባው፡ ሳቁን በአግባቡ ሳይጨርስ… አንቺ በጣሽ! አይሻልሽም እኔ ልሸልቅቅልሽ…
እንደገና ሌላ ረጅም ሳቅ…

ሱፔ፡ እቺ… ብጣሻም… ባሳቅ ፈረፈረችን እኮ…

ፌዶ እንደልማዷ ጓ! ብላለች፤ ሁላችንም ከልባችን እየሳቅን ነው፤ እሷ ግን አልፎ አልፎ ጥርሷን ብልጭ እያደረገች ተቆልላ ተቀምጣለች፡፡

ሰላ፡ አቦ ፌዶ ፈታ በይ… ቱታ ልበሺ… የምን ጓ! ማለት ነው…

ፌዶ መልስ አልሰጠችም፤ ከጥፊ ባልተናነስ ግልምጫ ገርምማው ሲጃራዋን ለኮሰች… ጉዞው ቀጥሏል… ባቡሩ በጭስና በወሬ ታፍኗል… mp3 እንደ ልማዷ ‘‘አንዴ ስሙኝማ…'' እያለች የተጓዡን ቀልብ ለመሳብ ትቅለበለባለች…

ጎሽ፡ አረ! ሽንቴን ወጠረኝ…
ይህን ጊዜ ሁላችንም እረፍት ለማድረግ ወሰንን… ሽንቱ የመጣበት ሽንት መሽኛ ፍለጋ… ትኩስ ነገር የሚፈልገው ሲኒ ማንኳኳት… ስልክ የሚደውለው ስልኩን ይዞ ጎምለል ጎምለል… እኔም የጉዞ ማስታወሻዬን በምስላዊ መረጃ ለማስደገፍ መቅረፀ-ምስሌን ብድግ አድርጌ… ቀጭ… ቀጭ… ቀጭ… ከደቂቃዎች በኋላ ተጓዦች ከየዕረፍቶቻችን ተመለስን… ወደ አንድ መንፈስ…

ቀንዶ፡ እስቲ የጉዞ ከፍታ አሳውቁ… ምርቃና ሌቭል ቼክ… ቼክ… ቼክ…
ግራ፡ እስውቅ
ሼባው፡ እኔ ክላውድ ናይን ላይ ነኝ…
ጎሹ፡ በሌቭል ከሆነ የኔ ሬድ ሌቭል ነው… ትንሽ ስቆይ ደግሞ ብላክ ሌቭል ይሆናል…

ካካካካ… ባቡሯ እንደገና የሳቅ ጭስ አፈናት… የጎሹ እንግሊዘኛዎች አድክም ናቸው… እንግሊዘኛና እሱ እጅና እግር ናቸው… አይገናኙም…

ሱፔ፡ እስቴኪኒ ያየ አለ?
ግራ፡ አ-ላ-የ-ን-ም እባካችሁ… መሃረቤን አያችሁ የሚለው ትዝ ብሎኝ ነው…
ፌዶ፡ አንቺ እብድ…
ቀንዶ፡ የምሳው ሽሮ ጥርስህ ውስጥ ተቀርቅሮ ነው?
ሱፔ፡ አይ! ቅድም ያጨስኩት ሲጋራ ጭስ ተቀርቅሮብኝ ነው…
እንደገና ሌላ ሳቅ…

mp3፡ ስሙኝማ…
ሰላ፡ አረ! ቆየን ከሰማን የሚጋግርብን አጣን እንጂ…
ካካካካ… ካካካካ… ካካካካ…

ወሬው ደርቷል… ይቀለዳል… ይሳቃል… በቃ ሙሉ መንገዱ አዝናኝ ነው… ሁሉም እብድ ናቸው፤ በቃ ጤነኛ ወሬ የሚያወራ የለም፡፡ mp3 በሰላ ትረባ ተናዳ ነው መሰለኝ ለተወሰነ ደቂቆች ‘ስሙኝማ' አላለችም… ኡፈይ ብለናል…

ግራ፡ አንተ ሰላ! mp3ን በቅድሙ ትረባህ mp0 (አም.ፒ.ዜሮ) አደረ‘ካት እኮ … አላወራም አለች…

ካካካካ… ካካካካ… ሰዓሊው እንደለመደው መሬት ላይ እየተንፈራፈረ ነው… ሼባው መሬት በእጁ እየደበደበ ይንከተከታል…

ምን አለፋችሁ… በቃ አንዲሁ በሳቅ አንጀታችን እንደቆሰለ፣ እንዲሁ ‘ስሙኝማ' እንደተባልን፣ እንዲሁ ጓ! እንደተባለብን፣ የጉዛችን መዳረሻ ተቃረበ…

ሱፔ፡ በሉ ደረስናል እንውረድ…
ጎሹ፡ እራት የሚበላ አለ? …ሁሉም ዝም…
ቀንዶ፡ በቃ ወደ አልጋችን ከመሄዳችን በፊት… አንዳንድ እንበል… ይህን ጊዜ ሁሉም እቃውን እየሸካከፈ፣ እየተጣደፈ ወረደ…

በሉ! ለዛሬው ይብቃን፤ እኔም ክፍሎቼን ዕቃዎቼ ውስጥ አስገብቼ… ምንድን ነው ያልኩት? እእእ… ዕቃዎቼን እክፍሌ አስገብቼ አንድ ሁለት ልል ነው… ማለቴ ነው… ‘መረቀንኩ እንዴ?'… በሉ በሉ… አፌ ተሳሰረ… ጉሮሮየም ደርቋል… ቀላል ጠምቶኛል… በሌላ የጉዞ ማስታወሻ እስክንገናኝ… ሰላም!